လက်ရှိ ကမ္ဘာကြီးတစ်ခုလုံးကို ရိုက်ခတ်နေသည့် လောင်စာဆီပြဿနာကြောင့် မြန်မာတို့ ပျော်ရွှင်မြူးတူးကြမည့် နှစ်သစ်ကူးအတာသင်္ကြန် မည်သို့ဖြစ်လာဦးမည်မသိ။ အိမ်နီးချင်းနိုင်ငံအချို့သို့ ဦးတည်လာကြမည့် အနောက်နိုင်ငံက ကမ္ဘာလှည့်ခရီးသွားများမှာ လေယာဉ်ခရီးစဉ်စျေးနှုန်းများ အပြောင်းအလဲကြောင့် ခရီးစဉ်များ ဖျက်သိမ်းကြောင်း ကြားသိရသည်။ ထို့အတွက် စီးပွားရေး ထိခိုက်မှု မည်မျှကြီးမားမည်ကို အသေအချာမသိနိုင်ပေ။ 

သို့သော်လည်း ကျွန်တော်တို့ဆီက အိမ်ရှင်မများအတွက်မူ လေယာဉ်ခရီးစရိတ်နှင့် မသက်ဆိုင်။ နေ့စဉ် ဝယ်ယူစားသောက်နေရသော အခြေခံကုန်ခြောက်များနှင့် အသီးအရွက်စျေးနှုန်းများ မတက်ရန်သာ အလွန် အရေးကြီးပေသည်။ စစ်ပွဲများသည် မကောင်းပါ။ နိုင်သူဖြစ်စေ၊ ရှုံးသူဖြစ်စေ စစ်ပွဲ၏နောက်ဆက်တွဲ လူမှုပြဿနာများကို ဖြေရှင်းကြရသည်။ ရှုံးနိမ့်သူအတွက်မူ ပို၍ပင် ဆိုးရွားပေလိမ့်မည်။ 

နွေ၏အပူ၊ ရတက်မအေးရသည့် စုံ – မ  ကိစ္စများနှင့် ရှေ့ဘာဆက်ဖြစ်မည်ကို မခန့်မှန်းနိုင်သည့် အခြေအနေများကြားမှ The Corner အတွဲ (၂၅) ကို ထုတ်ဝေလိုက်ရပါသည်။ 

 ပါဝင်သည့် ဆောင်းပါးအရေအတွက်ကိုမူ အတွဲ (၂၄) မှစ၍ အနည်းငယ် လျှော့ထားသော်လည်း ပင်တိုင် စာရေးဆရာများ၏ လက်ရာကား လျော့ပါးသွားခြင်း အလျင်းမရှိ။ နွေပူပူတွင် အပြင်မထွက်ချင်၊ သင်္ကြန်တွင်း ရေမစိုချင် သူများသာမက မနက်စောစော လောင်စာဆီ တန်းစီနေရသည့် အချိန်များတွင်ပါ စိတ်အေးလက်အေး ဖတ်ရှုနိုင်ကြပါပြီ။ 

စီစဥ်သူ